Фасети
Фасети се естетски надградби на предните заби, најчесто од нивната предна, највидлива страна. Терминот фасета се однесува на формата, бидејќи фасетата претставува тенка луспа која ја обликува видливата предна површина на забот. Овој поим повеќе се однесува на формата отколку на материјалот од кој е направена естетската надградба. Во однос на материјалот, постојат три главни типови: порцелански, акрилатни и нано-композитни фасети.
Порцеланските фасети се изработуваат од високо квалитетен порцелан кој обезбедува одлична естетика и издржливост. Тие нудат природен изглед и се отпорни на промена на бојата и абење, што ги прави долгорочно решение за естетски проблеми на предните заби.
Акрилатните фасети се наменети за корекција на естетски проблеми на предните заби. Меѓутоа, нивната физичка карактеристика, како порозност, провидност и сјај, не ги исполнува долгорочните естетски критериуми. Затоа, тие се препорачуваат како преодно решение додека не се постават порцелански.
Нано-композитните фасети се извонредно естетско и ценовно прифатливо решение за многу естетски проблеми на предните заби. Ова може да биде долгорочно или среднорочно решение, благодарение на можноста да се изработуваат во слоеви кои обезбедуваат боја, прозрачност, сјај и форма. Тие често се избираат од пациенти кога порцеланските фасети се одложени.
Унапредувањето на нано-композитните материјали овозможува изработка на фасети на модел, слично како порцеланските фасети. Тие се цементираат со композитни цементи, кои нудат цела палета на бои. Изработката може да се направи директно врз забите во една посета или индиректно во две посети: првата за анализа, подготовка и земање отпечатоци и втората за цементирање на фасетите изработени во лабораторија.
Со помош на овие современи материјали, еден или повеќе заби кои долго време го нарушувале изгледот, конечно придонесуваат кон хармонична и убава насмевка.
