Доколку мостовите се постари од 10 години, доколку оралната хигиена околу мостовите врз забите не е добра или прецизноста на мостовите не е добра, може да настанат различни проблеми: од појава на кариеси на вратот на забот под нивото на коронката и под гингивата или силно хронично воспаление на гингивата околу коронките. Во некои ситуации пак настанува кршење на природен заб во ниво на гингива и останува само корен на забот кој би можел да се оптерети со коронка но не е достапен затоа што е скршен. Тогаш потребно е гингивата, а понекогаш и околната коска да се ремоделираат и делумно да се отстранат со цел забот да може безбедно да се опфати со коронка и со тоа да му се врати способноста да џвака. Со процедурата: продолжување на клиничката коронка на забот всушност забот се спасува од вадење. Со локална анестезија и кратка интервенција коренот на забот станува достапен за да се надополни со колче и пломба и потоа со коронка. При таа процедура во нашата ординација честопати користиме и ласерска технологија со што се сопира крварењето и работењето е полесно и попрегледно. Најчесно од денот на интервенцијата околу коренот на забот и почетокот на протетската процедура за коронка, треба да поминат 3 недели, за ткивата околу коренот на забот да бидат здрави и стабилни и за да може прецизно да се сработи порцеланската коронка.