За да се обезбеди џвакање со заб кој е поставен врз имплант треба да се одработат 3 фази. Првата е вградување на имплантот, втората е постава на надоградба врз имплант која е носач на трајната коронка и трета фаза – чисто протетска, изработка на порцеланска коронка, мост или протеза носена од имланти.

Првата фаза опфаќа планирање и хируршка постава на импланти. Таа започнува со еден првичен преглед во устата на пациентот за да се согледаат условите на местото каде што фали заб/заби, да се направи еден темелен преглед на сите заби и меки ткива, да се установи нивното здравје или проблеми, да се земат податоци за општото здравје, да се проверат и уточнат правилни хигиенски навики, како и пациентот да се упати на соодветена рендгенграфија. Во одредени случаи потребни се поопсежни анализи како 3Д снимка, тн. cone beam computer tomography. Оваа снимка дава податоци за ткивата во милиметри и овозможува прецизно планирање, а за нејзината анализа најчесто се потребни неколку часа анализа и планирање на интервенцијата. Сепак оваа анализа не е потребна при секоја имплантација и затоа потребата од неа ја одредува исклучиво Вашиот доктор во ВЕГА.

На втората посета со докторот во ВЕГА, кој веќе го подготвил планот на терапија, ги дискутирате можните опции соодветни за Вас. Откако ќе се усвои најсоодветната опција, се закажува поставувањето на имплантите.

Во нашата ординација особено внимание посветуваме на планирањето, како и на објаснување на плановите на терапија, затоа што еден од главните приоритети ни е нашите пациенти да се добро запознаени со процедурата и комплетниот план на терапија од почеток до крај, и да знаат што треба да очекуваат.

Поставувањето на имплантите, после усвоениот план на терапија, се одвива со локална анестезија, безболно, на пример ако се работи само еден имплант, интервенцијата трае вкупно 40-тина минути. Потоа, со соодветни инструкции, пациентите се испраќаат дома, а утредента се прави една кратка контрола.

Втората фаза е постава на надоградби врз имплантите. Таа фаза е техничка и најчесто е неколку месеци после првата фаза.

импланти на крајот на низот, наместо протеза

Со соодветни прецизни инструменти се избираат најсоодветните елементи од имплантолошкиот систем за правилно оформување на гингивата околу имплантите, како и постава на надоградби врз имплантите. Се земаат мерки за работа на модел во заботехничка лабораторија, кадешто се избираат правилните агли на надоградбите за да се овозможи прецизна и правилна протетика врз имплантите. Оваа фаза е безболна и опфаќа неколку посети кои се пред сè технички.

Третата фаза е протетска и опфаќа проби на протетската изработка (коронка, мост или протеза) кадешто се проверува протетската конструкција врз надоградбите, се дефинира загризот и финалната естетика на протетската изработка.

мост врз импланти на крајот на забниот низ, наместо мобилна протеза

Успешно завршената импланто-протетска изработка овозможува непречено функционирање без разлика дали станува збор за минимални или изработки на цела вилица. Секако дека сложените случаи, кадешто се реконструираат многу елементи на системот за џвакање, бараат додатни посети и поопсежно работење. Но, враќањето на функцијата на џвакање и на естетиката на насмевката е крајна цел на секоја импланто-протетска изработка.

Завршената протетика врз импланти значи дека пациентот влегува во фазата на одржување на орално здравје, кое со точен ритам на посети за чистење на забите, конечно овој човек со санирано забало го ставаат во безбедна зона.